روايه رومنسيه/بين السراب والحب نظره

بين السراب والحب*(نظره)*

قصه من تأليفي من عدة اجزاء
قصه رومنسيه

الجزء الاول
تدخل سماهر حفله زواج خالتها وتمشي ع الدرج بخجل وبطئ وكل من شافها قال هدي ملاك (سماهر بنت حلوه كثير عمرها 16سنه بنت ولا كل البنات )
من كثرة خجلها ان تدخل الصاله لوحدها اخدت معاها تغريد بنت خالتها(تغريد عمرها 15 سنه واهي و سماهراصحاب قبل لايكونوا بنات خاله)
تمشي سماهر واهي ماسكه يد تغريد وامنزله راسها لانها مستحيه الكل يناظرها
وصلت للاهل وسلمت على بنت خالتها اخت تغريد (روضه عمرها 19 سنه)
روضه:هلا سماهر شهالحلاة قمر
سماهر:تتمسخري علي يعني؟عادي اتمسخري مهما كان مااحب غير المكياج الناعم
روضه:اي كدا احسن ناعم مومثلي غامق،اففففففف ادعي لي وحده اتشوفني وتخطبني لولدها
سماهر:هههههههه الحمد لله والشكر مجنونه

صاروا تغاريد وسماهر يتمشون برا الصاله ولاحظت سماهر ان فيه مره اتناظرها وخافت من نظراتها وابتعدت عن المكان اللي اهي فيه
بعد فتره جتها خالتها بدور
بدور:سماهروه شسويتي انتي ماشالله عليش طيحتي الكل
سماهر باستغراب:شنو مسويه انا ؟
بدور:ياذكيه في وحده شافتش قالت تبيش لولدها
سماهر بارتباك:لالالا مابي انا لساتني صغيره وبعدين حرام تظلم ولدها يمكن ولدها حاط براسه بنت ويبيها
بدور:علينا (وتغمز لها)قولي تبي اتحبي قبل الزواج مو كدا تلعبين علينا ،والله عاد المهم انها قالت تبيش لولدها وامش شكلها ماجابت خبر
سماهر:احسن
____________________________

من جهة ثانيه روضه قاعده مع سلمى اخت سماهر(سلمي عمرها 18 سنه)
روضه:ها كلمتي عمي؟
سلمى:اقول لاتقولي عمي اتكبريه بعده شباب.... قولي جواد(جواد يكلم سلمى بدون علم احد وسلمى اتحبه)
روضه:ههههههه اي كلمتي جواد؟
سلمى:سكتي كلمته والظاهر ان اختي سماهروه شاكه فيني اني اكلم ولد
روضه:اني منقهره من اختش سماهروه والا تطلع احلى منا؟ يلا كم يوم وان شالله تتجوز
سلمى:ان شالله عشان ارتاح وانا اكلم جواد

_____________________________

خلص العرس وتم المبارك للعروس والمعرس ومن بعدها الكل راح لبيته هلكان

ــــــــــــــــــــــــــــ

سماهر قبل ماتنام قاعده اتفكر
هدي من صجها تبي تخطبني حرام والله انا ماابي اتزوج كدا من اختيار الام ويمكن هو يحب وحده مابي افرقه من حبيبته
دارت وجهها ونامت


اليوم الثاني في بيت ام مازن ع الفطور الكل مجتمع صارت الجلسه عائليه (روضه و تغريد ومازن)ماعدا الوالد و سامي ماقعدوا ع الفطور
ام مازن:ها ولدي مازن متى افرح فيك؟
مازن:ادا شفتو لي وحده حلوه واحلى من خواتي هالبايخين
روضه:اقول احترم حالك
تغريد:هالبايخ احنا احسن واحلى منك والله
مازن:انزين خلاص خلاص
تغريد:اي شرايك ببنت خالتي سماهر ترا قمر اتجنن لكن انتظرها توها عمرها 16 سنه
روضه:اي خدها قمر انا والله غيرانه من جمالها هدي والكل البارح في الحفله انعجب بها
مازن دقت في راسه فكرت سماهر بنت خالته وخطط باي شي عشان يشوفها
مازن:تغريد ابي اشوف صورش يوم كنتي صغيره؟
تغريد فهمت قصده بس حبت تستعبط:ليش انت كل مره اتشوفهم
مازن:شو عيب اشوف صورة اختي يوم كانت صغيره فيها براءه؟مو الحين كبرت وعجزت وجهها مليان تجاعيد لا حول
تغريد:ظريف
راحت ثواني ورجعت بصورتين بس
وقالت له بادنه:ادري تبي اتشوف سماهروه
ابتسم لها مازن وطالع الصور
يوم شاف سماهر طلعت عينه من مكانه
راح همس في ادون اخته تغريد:تغريدوه حليووه
وقال بنفسه(خلاص دخلت براسي)لازم الاقي طريقه عشان اكلمها

ـــــــــــــــــــــــــــــــــــــــــــــــــ


بيت ابو ماجد
سماهر قعدت من النوم غسلت ونزلت للفطور
سماهر:صباح الخير
الكل:صباح النور
سماهر:آآآآآآآآه iam hungry
مرام(اخت سماهر وعمرها 3 سنين):وشو يعني؟
سماهر:يعني جوعانه
مرام:والجوعان وشو يسوي؟
سماهر:ياكل
مرام:عجل اكلي واسكتي
ماجداخو سماهر عمره 23سنه خلص الدراسه يبحث عن عمل وبدون فايده)
ماجد:سماهر بعد الفطور ابيش في غرفتي
سماهر:ليش شفيه؟
ماجد:انتي تعالي وبتعرفي بعدين
علاء:اوه اوه بينهم اسرار اشوف (علاء عمره 20 سنه خلص الدراسه ويبحث ايضا عن عمل)
ماجد:انت مالك خص
علاء:ان شالله ان شالله

بدا الخوف وعلامات الاستغراب على سماهر اكلت بسرعه وراحت غرفه اخوها ماجد واهو قام وراها على طول
ماجد قفل الباب وقعد اخته على الكنبه وقعد تحتها وهو ماسك يدها
سماهر:ماجد شفيك؟
ماجد:سماهر شفتي ضحى البارح في الحفله لو ماراحت؟
سماهر:الله بغربل ابليسك ياماجد كل كدا اتسوي فيني عشان ضحى؟(ضحى صاحبه سماهر عمرها 18 سنه وضحى اتحب ماجد وماجد يحب ضحى)
ماجد:سماهر بسرعه جاوبيني شفتيها؟
سماهر:اي شفتها واتسلم عليك وقالت لي اقول لك شي في ادنك
قربت سماهر لأدن اخوها وهمست في ادن اخوها وقالت(احبك) هدي من عندها اهي
ماجد ومن فرحته باس اخته وقام شغل الاغاني و علا الصوت وقعد يرقص واخته سماهر تضحك عليه ونفس الوقت مستجنه عليه لأنها تحب رقص الاولاد
أبو ماجد سمع صوت الاغاني عالي وراح دق باب غرفه ماجد لانه مستغرب
فتحت سماهر الباب لأن ماجد حواسه مو معاه واهو يرقص
ابو ماجد:سماهر وش فيه اخوش؟لا بالله الولد استجن وقعد
انتبه ماجد لأبوه وقصر ع الاغاني وسوا حاله مؤدب
طلع ابو ماجد واهو مبتسم لولده
وسماهر قعدت تضحك على طريقه ادب اخوها
ماجد بتقليد على اخته:هههههههه مافي شي يضحك تراا (اة مايدري ابوي اني هايم بالحب وبوحده اسمها ضحى سلبت مني كل شي)
سماهر:هيييييه يابو الشباب وين رحت؟انا بطلع الحين تبي شي
ماجد:اطلعي يلا وريني مقفاش خلني احلم بحبيبتي
سماهر:الحمد لله والشكر

راحت من الملل قعدت ع النت لقت بنت خالتها تغريد شابكه النت
كلمتها
تغريد:سماهر غناتي انتي
سماهر:يااااااااااي أكثر أكثر
تغريد:عمري وروحي وقلبي ووجداني وكل حياتي
سماهر:خلصيني شتبي مني اعرفش مو لله
تغريد:أبيش اتجي بيتنا ملل اليوم
سماهر:اممممممم على حسب ابوي او اخواني ادا يقدرون احد منهم يجيبني
ــــــــــــــــــــــــــــــــــــــــــــــــــ ــــــــــــــــ
نزلت على طول وقالت لأبوها قل انه بيوصلها عادي
راحت اتصلت على رقم بيت خالتها عشان بتكلم تغريد
،،،،،،،:ألو
سماهر:الو السلام عليكم
،،،،،،،:وعليكم السلام
سماهر:لو سمحت موجوده تغريد
،،،،،،(يعني وين بتروح في الظهر):اي موجوده لكن في الحمام من اقول لها ؟
سماهر:انا سماهر بنت خالتها خلها اتكلمني ضروري
،،،،،،(سماهر)؟:بارتباك:أأأ أوكي اقول لها باي

سماهر استغربت من هلطريقه هدي بالنهايه وانه قفل عليها الخط
سماهر:هدا اعتقد مازن،ليش كدا ارتبك ؟يلا ماعلي منه
العصر الساعه 4 راحت لبيت خالتها ولما يكون سامي ومازن مو موجودين اهناك تفصخ لفتها اللي على راسها
ولما راحت ماكانوا موجودين وفصخت لفتها
راحوا قعدوا في الغرفه وقعدو جنب الكمبيوتر
تغريد:سماهروه شوفي انا بروح اجيب الجدوع على مااجي انتي قعدي ع النت
سماهر:تغريدوه بلا هالرسميات هدي انا مو غريبه
تغريد:مالش شغل سكتي
سماهر:بكيفش انتي اللي بتتعبي حالش مو انا
طلعت تغريد وبقت سماهر في الغرفه وفتحت النت وجت بتفتح ايميلها
توها بتحط كلمه البسر انفتح الباب
سماهر افتكرت تغريد فمارفعت راسها
،،،،،،،،،،:ياهلا تو مانور البيت
سماهر سمعت صوت رجال رفعت راسها على طول
سماهر:مازن؟
مازن:اي مازن اخباره الحلو؟
سماهر ماعجبتها طريقته وانتبهت ان لفتها مو على راسها فعلى طول حطتها على راسها
سماهر ظلت ساكته
مازن بحبث:ماتوقعتش بهالحلاة والله
سماهر:مازن اطلع لو سمحت
مازن؟شووو ؟بيتنا وتطرديني منه؟
سماهر:انا ماطردتك لكن من باب الاخلاق والادب ان مكان فيه بنت مايصير فيه ولد اطلع لو سمحت
مازن:خلاص اطلع لكن (رفع حاجب وقال لها) انتي حلوه
طلع على طول وبقت الصدمه داخل سماهر
معقوله هدا يكون خسيس كدا؟حقير
تو بترجع تقعد ع الكرسي جنب الكمبيوتر وتمسك الماوس الا واهو راجع
مازن:هدا ايميلش؟اها خلاص انتظري اضافتي طيب؟
سماهر ماتحملت وقاحه مازن ودزته
مازن انصدم من فعلة سماهر
وسماهر بنفسها مصدومه من هالشي اللي سوته
ظل مازن يناظرها وبكل وقاحه وخبث
مازن:تدزيني؟
سماهر:وادز عشره غيرك
مازن:طيب ان ماخليتش تندمين بس يا سماهر
طلع من الغرفه وبقت سماهر تتسائل بشنو بينتقم لها
رجعت بعد دقايق تغريد
سماهر:انا دقيت على ابوي بيجيني الحين
تغريد:سماهوروه توش جايه
سماهر بنظرات معدومه:باروح بيتنا تعبانه
تغريد:براحتش

دق جوالها بعد خمس دقايق وطلعت من بيت خالتها لان المتصل ابوها
في الصاله
مازن:شو الناس بتطلع وبدون ماتقول لنا مع السلامه؟
سماهر:تغريد مع السلامه
مازن:هدي المره الثانيه اتقوليها لتغريد واحنا لا؟... شو احنا مو ناس شايفتنا؟
سماهر:ابوي برا تغريد انا طالعه تامريني بشي؟
تغريد واهي مو مستوعبه اي شي:سلامتش حبيبتي
سماهر:باي
تغريد:باي
وصلت تغريد سماهر للباب الخارجي ورجعت
تغريد:مازن
مازن واهو واقف ويبي يبتعد عنها :نعم
تغريد:شفيها سماهر اتكلمك كدا ؟
مازن:ممكن سؤال؟
تغريد:اسال
مازن:سماهر صاحبتش لو مو صاحبتش؟
تغريد:صاحبتي واكثر بعد
مازن:عجل روحي سأليها اهي
ودخل غرفته ولمس كتفه(آآآه يا سماهر اثاريش قويه،اصلا انا غلطان ماكان المفروض اسوي كدا... واصلا طريقتي مو طريقه واحد عاقل طريقتي كانت طريقه مهاجمه وعداء)وفوق كدا قلت لها بنتقم الله يستر كان ماتخاف من كلمتي... لكن انا اي شي في بالي باسويه ولا تهمني بنتقم وبحبها بعد
_____________________________


في السياره

أبو مازن لاحظ على بنته سماهر انها مو على عادتها لانها من اول ماركبت السياره ماتكلمت معاه وهدا مو من عوايدها
أبو ماجد:سماهر بابا شفيش؟
سماهر:ها؟لا مافي شي بس راسي مصدع اشوي
ابو ماجد:ماتشوفي شر
سماهر:الشر مايجيك
ــــــــــــــــــــــــــــــــــــــــــــ
سماهر دخلت البيت وراحت قعدت في الصاله تعبت ومسكت على راسها من الالم
مرام:سماهروه وشو فيش؟(بنبرتها الطفوليه البريئه)
سماهر ماحبت تتجاهلها واتزعلها:تعبانه اشوي رايس يالمني
مرام:اللي راسه سعوره وشو يسوي؟
سماهر:يشرب حبوب ويرتاح اشوي
مرام:عجل روحي اشربي حبوب وارتاحي
سماهر بسخريه مع انها تعبانه:ان شالله عمتي

أخدت لها 3 حبات وشربتهم واتدكرت اللي صار مع مازن وانزلت دمعتها
دارت الا وتشوف اختها مرام اتناظرها باستغراب وكأنها تبي تكتشف شي من دمعة اختها
سماهر:حبيبتي مرام انا بروح غرفتي طيب؟
باستها وراحت
دخلت غرفتها وبكت
دقايق الا يدق اخوها ماجد الباب مسحت دموعها وفتحت الباب
ماجد:سماهر دقي على ضحى كلميها
سماهر:ليش؟
ماجد:كلميها واسالي عن احوالها وكدا يعني
سماهر:مو فاضيه الحين
ماجد:شعندش ليش مو فاضيه؟
سماهر:تعبانه
ماجد بسخريه لان اخته رفضت له طلبه(كتف يده وقال):وبالله من ايش وليش تعبانه؟
سماهر:ماجد ابتعد من هنا لا أسكر الباب بوجهك
ماجد بخبث:انا رايح
ــــــــــــــــــــــــــــــــــــــــــــــــــ ــــــــــــــ
من زاويه ثانيه في بيت ابو ماجد
كانت سلمى اتكلم جواد(حبيب القلب)
ومن دون علم احد طبعا
جواد:آآآآآآآه سلموه متى اتصيري ملكي
سلمى:اعتبرني من الحين ملكك حبيبي
جواد:احم احم سلموه نفسي مره اغازلش بشي وتخجلي
سلمى:ههههههههههاي روح اتعرف على اختي سماهروه وغازلها بتستحي
جواد:مابيها ابيش انتي
سلمى:تسلم لي قلبي
جواد:سلمى بطلب منش طلب فديتش لاترديني
سلمى:مابردك قول
جواد:ابيش تعطي روضه بنت اخوي صوره من صورش واهي تعطيني اياها
سلمى:شنو اتقول انت؟اكيد لا
جواد:سلمى ليش؟نهايتي اشوفش اليوم او بكره فليش ماتبي اشوف صورتش؟
سلمى:لا رجاء جواد لا
جواد:سلمى ياعمري اسمعيني أنا كل ماشفتش اشوفش وكاني ماشفتش متغطيه ولا اشوفش عدل وانتي نهايتش لي ملكي وزوجتي يعني ليش ماتبيني اشوف صورتش؟
سلمى:خلاص جواد افكر واقول لك بعدين باي
جواد:زعلتي؟
سلمى:لا اصلا كلامك صحيح باي
جواد:باي

ــــــــــــــــــــــــــــــــــــــــــــــــــ ـــــــــــــ
خلصت سلمى مكالمتها مع جواد واتصلت على طول على روضه
روضه:الو
سلمى:هلا
روضه:اهلين كيفش؟
سلمى؟تمام بس في شي بسألش عنه عمش جواد قال يبي صورتي
روضه:اي؟
سلمى:اي؟يعني وشو اعطيه اياها لو لا؟
روضه:بصراحه وبدون ماتزعلي؟انا اقول اعطيه صوره من صورش
سلمى:باي ،بكره لما انروح بيت اهل امي اعطيش الصوره
روضه:اوكي باي
ـــــــــــــــــــــــــــــــــــــــــ
بعد يوم راحوا كل العائله الى بيت اهلهم
سماهر قعدت مع تغريد
وسلمى مع روضه

سلمى عطت روضه الصوره عشان تعطيها الى جواد
روضه:يلا خلنا انروح نستعبط اشوي على سماهروه وتغريدوه
سلمى:يلا

ـــــــــــــــــــــــــــــــــــــــــــــــــ

الاكمال في الجزء الثاني

مشكور اخوي
اتمنى تحط الجزء الثاني

مشكور اخوي وجزاك الله خير

الجزء الثاني
راحوا وقطعوا السوالف بين تغريد وسماهر
روضه:سماهروه اخبار هديك المره اللي قالت تبيش لولدها؟
سماهر:اخديها لش هي وولدها ماابيهم
روضه:آآه ياليت والله... سلموه قومي عنهم مو عدله قعدتهم وسوالفهم
سماهر:هههههههه الظاهر يبونا نتكلم لهم عن الحب
سلمى:شفيه الحب؟كاهي روضه بتعطي حبيبتي صورتي
سماهر ناظرت اختها لاشمئزاز لأنها تدري انها تقصد حبيبها مو حبيبتها
انتهت سلمى من كلامها واخدت روضه بعيد عن سماهر وتغريد
سلمى:روضوه اكيد اختي فهمت
روضه:اووووه ماعليش منها وش بتسوي اهي يعني؟
سلمى:ياذكيه بتقول لأمي
روضه:لا مابتقول ولو قالت امش مابتصدق تدري ان امش ماتصدق اي شي اختش سماهروه اتقوله
سلمى:وليش ماتصدق يعني؟
روضه:ياغبيه امش اتحبش اكثر منها واهي عادي مو لداك الزود يعني لاتشيلي هم
ــــــــــــــــــــــــــــــــــــــــــــ

بعد ساعتين دخل مازن
واهو جنب الباب انحنح:يالله يالله
خواته وخالاته:اتفضل
سماهر لما شافته طلعت التهويه (الحوي)
قعد اشوي وطلع الى المكان اللي فيه سماهر
مازن:شو ليش طلعتي لما نا دخلت؟
سماهر غطت وجهها عنه:شتبي؟
مازن:حبيت اسلم على بنت خالتي
سماهر:الله يسلمك..في شي ثاني؟
مازن اتقرب منها اشوي:هه مقبوله من الحبايب شوفي انا مابقدر انتقم منش لكن اللي اقدر اسويه اني احبش
وفوق كدا اخليش غصب طيب اتحبيني
سماهر:ظريف ترا مو انت الولد الوحيد بهالدنيا عشان احبك
مازن:انشوف،وادا ماحبيتيني راح تاخديني وانتي ماتحبيني وانتي وقتها المظلومه .....سلام
راح طلع من البيت وخلا سماهر بحيرتها تو بتبكي حست بحالها:ماابكي عشان واحد مايستاهل
دخلت البيت وكلمتها امها
ام ماجد:سماهر غناتي روحي كلمي نادر(صاحب اخوتها علاء وماجد)وقوليله يجي لنا
سماهر:ليش مايجي واحد من اخواني؟
ام ماجد:سيارت علاء في المصلح وماجد ابوش اخدها وراح بها العمل وسيارة ابوش نفس الشي خربانه واخوش قال ان نادر هو اللي بيودينا البيت
سماهر:طيب ليش ماتكلمه مرام؟ اهي صغيره اما انا مو عدله اكلم ولد
ام ماجد:عادي عادي هدا مثل اخوش كلميه
سماهر(ليش امي مصره اففف يلا امري له) طيب هاتي جوالش
ام ماجد:لا كلميه من جوالش وخلي رقمه موجود مو تمسحيه
سماهر:طيب
ام ماجد:هدا هو الرقم **********
طلعت سماهر الى التهويه واتصلت على نادر

نادر:الو
سماهر:الو السلام عليكم
نادر:وعليكم السلام من معاي اختي؟
سماهر:انا سماهر اخت علاء وماجد اصحابك ،انت نادر صح؟
نادر:اي ياهلا
سماهر:نادر معليش اعدرني لاني اتصلت عليك واني بخزن رقمك عندي لان امي طلبت مني هالشي عشان ادا احتجنا لشي منك... لكن بس شي واحد واسكر ادا ماعندك شي الحين تعال خدنا البيت
نادر:شدعوه سماهر عادي مو مشكله ،خلاص دقايق وانا عندكم
سماهر:تسلم ومشكور
نادر:العفو ولو
سماهر:باي
نادر:باي
ــــــــــــــــــــــــــــــــــــــــــــــــــ ــــــ

مكالمه بين ضحى وسماهر
ضحى:اخبار ماجد؟
سماهر:الحمد لله تمام
يقاطعها اخوها ماجد:من تكلمين؟
سماهر تخاطب ماجد وتبعد السماعه اشوي:ضحى
ابتسم ماجد وقال:سلمي عليها (هم يحبون بعض كدا من اول نظره بعدين اقول لكم كيف تم تعارفهم لكن مايكلمون بعض ع التلفون ولا اي شي)
سماهر:ضحيوه يسلم عليش اخويي؟
ضحى من الخربطه:من؟
سماهر:علاء،يعني من غير ماجد؟
ضحى بخجل:الله يسلمه سلمي عليه
سماهر:اففف بقضيها لكم سلامات انا؟وبعدين تعالي اشوف مسويه حالش مستحيه عكس ليله الحفله قلتي احبه بدون اي شي... شنازل؟
ضحى:الاولاد يحبوا البنت الخجوله زيش يعني ياهبله لازم احاول اصير خجوله
سماهر:هههههههه تعالي ترا خزاني مليان من الخجل
ضحى:هههههههه يلا بسكر باي
سماهر:بايات
ـــــــــــــــــــــــــــــــــــــــــــــــ
سماهر اتفكر باللي قالته قبل يومين اختها (أنا بعطي صورتي لحبيبتي)
فكرت انها لازم اتقول لامها لأن اللي اتسويه اختها (عيب)ولازم اهي تنقدها واكيد ان الصوره رايحه لولد مو بنت لأنها شاكه فيها من زمان ولازم ماتخلي مجرد صوره تهدم عائلتها اللي راسها دوم مرفوع
راحت لأمها
سماهر:يمه ممكن اتكلم معاش بموضوع؟
ام ماجد:اتفضلي
سماهر:يما اختي سلمى
ام ماجد:شفيها؟
سماهر(شقول لها انها بتعطي صورتها لولد؟بتصدقني؟):رح تعطي صورتها لولد
ام ماجد:عيب عليش اتقولي عن اختش كدا
سلمى:انا من زمان ملاحظه عليها انها تكلم ولد لكن اتوصل المواصيل يمه الى صور لازم اقول وانتي بكيفش ادا ماصدقتي ترا أهم ماعند الواحد ستره وبيته ماينهدم ويظل راسه عالي
طلعت سماهر من عند امها وخلت امها بحيره مو قادره اتفكر باي شي

ـــــــــــــــــــــــــــــــــــــ
طلعت رن التلفون
سماهر:الو
نادر:الو السلام عليكم
سماهر:وعليكم السلام
نادر(حس انها سماهر لأن صوتها من داك اليوم واهو في مسامعه ماراح من باله):سماهر؟
سماهر:اي نعم سماهرمن معاي اخوي؟
نادر:انا نادر كيف حالش؟
سماهر:ياهلا نادر اخبارك؟
نادر:تمام الحمد لله علاء مو موجود؟
سماهر:لا والله مو موجود اتصل على جوالاته
نادر:اتصلت مقفل
سماهر:مادري والله اخوي خلاص ادا جا اقول له يكلمك
نادر:شكرا
سماهر:العفو
نادر:باي
سماهر:باي

مره ثانيه ورد التلفون يرن ورفعته سماهر
سماهر:الو
روعه(صاحبة سماهر الروح بالروح اهي وصبا وضحى):هلا سهوره
سماهر:هلا والله يادعله(هبله_عبيطه) اخبارش؟وحشتيني
روعه:تمام الحمد لله وانتي بعد وحشتيني كثيييير شوفي انا و ضحي وصبا بنجيش الحين مانتي مشغوله؟
سماهر:لا والله مو مشغوله تعالوا حياكم خل نكسر روتين الملل اليومي لكن ضحى وصبا قلتي لهم ؟
روعه:ههههه شوفي احنا طبخنا الطبخه كلها وخلصنا بس باقي السكر حق الحلى ونجهز خلاص وكاهو جينا للسكر الحين
سماهر:هههههههه تعالوا حياكم
روعه:حسبي حسابش بنقعد لليل وبنجي الساعه 4 ونص
سماهر:قعدوا لليل عادي البيت بيتكم
روعه:عجل مره وحده اجيب ثيابي للنوم مادام البيت بيتي
سماهر:هههه عادي لكن ممنوع فصخ العباة في الصاله في اولاد خخخ
روعه:هههه مالت عليش باي
سماهر:باي
ـــــــــــــــــــــــــــــــــــــــــــ
راحت سماهر تعدل المجلس واتحط فيه الجدوع(الأكل اللي يقدموه للضيوف)
سبحت (اتروشت)واتعدلت وبعدها بخمس دقايق جو صاحباتها
روعه:ايه الجمال دا؟
سماهر: دخلي دخلي
صبا:هلا حبيبتي اخبارش؟
سماهر:بخير دامني شفتكم
ضحي:ياهلا
سماهر:اهلين حياكم اتفضلوا
دخلوا المجلس وقعدوا

روعه :سمعت خبريه انو البنت لما بتتزين هيك معناته انها عشآنه(عشقانه)
سماهر:عشقانه عيونش سكتي واللي يرحم والديش
ضحى:سماهر قلبي يألمني
سماهر فهمت لأنها يمكن اتشوف ماجد:هههههههههه الله بغربل ابليسش ياهبله
ضحى:لا جد والله يألمني
سماهر:عجل خلني اجيب بعض الناس يحطون يدهم على قلبش وبيروح الألم (وتغمز لها)
ضحى:اعقلي عااد
روعه:صبوه خلنا انقول في عندهم اسرار بالتغمز
سماهر:قعدي انثبري مكانش مافي شي اصلا
صبا:شنو اخر مستجداتش سهوره؟
سماهر:اممممم مع ولد خالتي مازنوه
روعه عدلت قعدتها:قولي قولي
سماهر:طيب..... شفته قال لي كلام كثير من صياعته الصياعه..المهم انه من فعايلي دزيته مره من المرات وقلت له كلام سم
روعه:عسا يتحول كرهش له الى حب
سماهر:فال الله ولا فالش

قعدوا لين الليل وتطلعت ضحى قبل العشا لأن ابوها جا لها
سلمت ع البنات وطلعت
فتحت باب الطريق الا تلاقي ماجد بوجهها
ماجد عرفها لانها ارتبكت لما شافته
ماجد:ضحى؟
ضحى بارتباك:كيف حالك ماجد؟
ماجد:بخير الحمد لله
ضحى راحت بدون ماتقول شي
دخل البيت وابتسم لكن حس بعدها ان فرحته مارح تكتمل
اجا وقت العشا وقامت سماهر تبي اتحط لهم الاكل ونفس الوقت
روعه:ابي اروح الحمام
سماهر:روحي لكن روحي الحمام اللي برا في التهويه يمكن اخواني قاعدين في الصاله مابتقدري تعبري الى الحمام
راحت روعه الحمام وسماهر راحت عشان اتجهز العشا
بقت صبا لوحدها

وقعدت اتحوس بجوالها من الملل
فجأه دخل علاء المجلس يفتكر مافيه احد وراح يبي ياخد له بيبسي من الثلاجه
دخل اخد البيبسي ولا انتبه لوجود احد لما كان بيطلع حس ان فيه احد
طالع وراه شاف صبا وقف لمده يطالعها
علاء (شهالجمال اشحلاتها ، هدي من صاحبات سماهر لو سلموه؟)
حست ان فيه شخص موجود رفعت راسها لاقت علاء
ظلوا الاثنين يطالعوا بعض لكن صبا اتطالعه من الصدمه واهو يطالعها كـبداية اعجاب)
حست لنفسها واتغطت واهو حس لنفسه لما اهي اتغطت وطلع وانتبه عشان ماحد يشوفه طالع من هناك
رجعت على طول روعه بعدين
روعه:شحلاة ديكور الحمام ايجنن حقهم
صبا:لايكون سنه قاعده تتمنظري في ديكور الحمام؟
روعه:اي والله روحي شوفيه ايجنن
صبا:غبااااااء

علاء راح لأخته سماهر
علاء:من معاش؟
سماهر:صاحباتي
علاء:من؟
سماهر:وليش تسأل ان شالله
علاء:أ أ أ عشان اعرف اهلهم عيب اعرف اختي من تعرف؟
سماهر:بيت فلان وفلان
علاء(ماستفدنا شي)راح عنها ودخلت اهي المجلس
اتصلت من جوالها لأخوها ماجد
سماهر:هلا ماجد تقدر تطلع من البيت
ماجد:مالت عليش مقعدتني من النوم عشان اطلع؟مانا طالع مكان
سماهر حبت تقتله غيره:عجل خلاص باخلي علاء ياخد الاكل ويوديه بيت ضحى
ماجد:ها؟لا والله هدا اللي ناقص خلاص جهزي الاكل الحين انا اخده منش

راح ماجد اخد الأكل وطلع يروح بيت ضحى
وصل لبيتهم
طلع له اخوها الصغير
فادي:نعم
ماجد:وش فيك اتكلمني من خشمك؟
فادي:متشاجر ويا اختي
ماجد:هههههههه شوف هدا اعطيه الى ضحى
فادي:مابعطيها اياه
راح دخل وخلا ماجد برا مستغرب ومو عارف شيسوي
اشوي لا وبنت من ورا الباب
،،،،،،،،،:نعم اخوي شتبي؟
ماجد:كيف حالش ضحى ؟
ضحى ارتبكت:ياهلا ماجد
ماجد:ضحى هدا من عند اختي لش لأنش ماتعشيتي معاهم
ضحى اخدته منه:شكرا وسلم عليها
ماجد:الله يسلمش ،ضحى؟
ضحى:نعم
ماجد:لو صار لي شي بتظلي معاي لو بتنقلبي ضدي؟
ضحى:شالداعي من السؤال؟انت مافيك شي يقلبني ضدك وانت عارف هالشي
ماجد:احس نهايتي قربت ماأقصد الموت لا.... احس بشي ثاني بيبعدنا كلنا
ضحى:ماجد ادا تبي فرقاي براحتك بس لاتقول كلام مثل هدا
ماجد:لا يا ضحى مابي فرقاش انتي تدري اني احبش لكن الشي اللي ماتدري عنه ان نهايتي قربت واهي شبه للموت بتبعدني عنش وعن اهلي واصحابي
ضحى وبدا يبان عليها الانهيار والصياح:ماجد
ماجد:خلاص خلاص اسف لكن احبش...باي
ضحى راحت لغرفتها وبدت تبكي و خافت على ماجد
مره وحده نامت بدون حواس
وقعدت الصبح لقت اخوها فادي
فادي:ضحيوه ترا ماأكلنا الأكل اللي جابوه لش لأنه من حبيبش
ضحى:اسكت انت

ــــــــــــــــــــــــــــــــــــــــــــــــــ
من طرف ثاني في بيت ابو ماجد
ام ماجد قاعده مع سلمى تتكلم معاها عن سالفه الصور
ام ماجد:سلمى اعترفي لي ومرح يصير شي بس مو زين اتهدمي بيتنا بعد ماأبوش كبره ورفع راسنا
سلمى:مافي شي اهي تكدب عليش
ام ماجد:من اللي تكدب؟انا ماحد قال لي شفتي يعني انتي صج امسويه الغلط
سلمى(مافي مجال للكدب لازم اعترف واللي فيها فيها):انا احبه
ام ماجد:من؟
سلمى:جواد عم روضه
ام ماجد: !!!!!!!!!!!!!!!!!!
دخل علاء يبي يتكلم مع امه لكن قبل مايدخل سمع السالفه كلها وان فيه صور ومكالمات فانصدم اهو لكن لو كانت تحب حب عادي بدون صور ومكالمات تلفونيه ماكان بيقول شي لأنهم ماهم من النوع المتعقد من الحب

سلمى شافت اخوها معصب
اقترب ليها اخوها وبدا الخوف على سلمى

الاكمال في الجزء الثاني

شنو رد علاء ع اللي سوته اخته؟
ام ماجد شنو مصيرها؟
جواد بينسكت عنه لو رح يلاقي من يعاقبه بشي؟
علاقه روضه و سلمى بتظل ولا رح يتخاصمون لما ايصير هالشي؟
سلمى وجواد بيظلوا يحبوا بعض والا بينهدم الحب؟

ياهو على القصه
كمل كمل وانت ماتشوف الدرب